Hato U Jisu U ïap tang na ka bynta ki Khristan?

Eliphas Mukhim

04/22/2020

            Nga sngewkmen haba nga ioh kum kane ka lad ban jubab ia kum kine ki jingkylli ha kaba iadei bad ka jingngeit khristan jong ngi. Ka daw ba kane ka jingkylli ka mih namar  don iwei I khun jong ka Balang U Khrist Wahiajer I ba don I paralok I ba dang long ha ka Ñiam Khasi lane ka Ñiamtre kaba ngi khot shane sha Pnar, ha ka jingiakren jong ki shaphang ka jingngeit jong ki, te ka mih noh kane ka kyntien ba la ong da ine I paralok I ba dang long Ñiam Khasi ba u Jisu u iap dei tang na ka bynta ki khristan ym na ka bynta jong kiwei pat ki bym long Khristan. Ho,oid ki don bun ki jinghikai kiba hikai kumta ba U Jisu u ïap tang na ka bynta ki khristan, te ban batai ia kane ka jingong kaei kaba la pynlong ia ki briew ban pynkhat kumta ngan sa batai pat ha kawei ka jingthoh jong nga. Ia mynta hi nga kwah ban jubab beit beit ia ki kyntien ba ine I paralok I la ong ba U Jisu U ïap dei tang na ka bynta ki khristan. Nga kwah ba phin sngewthuh ia kane bynta lyngba kine harum:

1. U Jisu u ïap kat kum ka jingbuh beit U Blei (Jehovah):

1Pet:1:19-20:

Hynrei da ka snam bakordor, kum ka jong u khun langbrot ba khlem pop bad ba khlem thohbria, ka jong U Khrist keiñ; ia uba la thmu lypa naduh bym pat seng nongrim ia ka pyrthei, hynrei la pynmih paw ia u ha kine ki ïa kiba khatduh na ka bynta jong phi.

            Ka Ktien U Blei ka iathuh shai ia ngi ba ka jingiap jong u Jisu ka dei kaba u la thmu lpa naduh shwa ba un pynlong ne thaw ia kiei kiei baroh kiba don ha ka pyrthei.Hashwa ba kan mih kano kano ka jiad ñiam ne ka jait jingngeit.U Blei u tip lut ia kaba sdang bad ba kut; U tip ruh wat hadien ba u la thaw ia u briew u briew un sa leh pop, un shna ruh ia ki Ñiam thymmai ha la ka jong ka jong ka jingkwah jong ki.

Rom:6: 23:

 Namar ka bainong jong ka pop long ka jingiap; hynrei ka jingaiei ka jong U Blei ka long ka jingim bymjukut da U Khrist Jisu uba long U Trai jong ngi.

            Ka Baibl ka iathuh shai ba ka jingleh pop jong u briew ka wanrah ka jingiap bad ka jingpynshitom bumjukut junom la junom ia u briew ha ka dujok. Te ban pyllait ia u briew na kane ka jingjynjar bynjukut ha dujok, u Blei u la don lpa ka jingthmu hashwa ba un pynlong ia ka pyrthei kumno ban pyllait im ia u briew na kane ka jingpynshitom namar ki pop jong u, bad mano ban pyllait im ia u. Kumta U Blei u la pynkhreh da U Jisu ban iap halor jong ka diengphna ha ka jaka u briew kum ka jingkñia namar ki pop ki jong u briew ha ka ban pyllait-im ia u briew na ka jingpynshitom U Blei.

1Korinth:15:3:

Namar nga la aiti pateng ha phi kaba nyngkong eh ia kata kaba nga la pdiang ruh, ba U Khrist u la iap namar ki pop jong ngi kat kumba la thoh.

2. U Jisu u ïap na ka bynta ki briew baroh:

1John:2:2

Bad ma u hi ruh u long ka kuna na ka bynta ki pop jong ngi, bad ym tang na ka bynta kita ki jong ngi hi, hynrei na ka bynta ki jong ka pyrthei baroh.

2Korinth:5:15a:

Bad u la iap ruh na ka bynta baroh

 1Pet:3:18

Naba U Khrist ruh u la shah shitom shisien namar ki pop, U Bahok na ka bynta ki bym hok, khnang ba un ioh ialam ia ngi ha U Blei; haba la pyniap ia u ha ka doh, hynrei ba la pynlong im ia u ha u Mynsiem.

             Kine ki lai tylli ki bynta jong ka jingthoh ka Ktien U Blei ka iathuh ia ngi ba U Jisu u ïap ym tang na ka bynta ki bangeit ha u ne kaba ngi khot ha kine ki sngi ki Khristan, hynrei u ïap ruh na ka bynta ka pop jong ki briew baroh. U Jisu iap na ka bynta ki jaid briew baroh, la ki dei ia ki muslim, ki hindu, ki budhist, ki Jian, ia ki bym ngeit blei, U ïap ruh na ka bynta jong phi ki Ñiam Khasi ne ka Ñiamtre. Tangba ka Jingiap jong u ka treikam bad ka longdoh long snam, ka ai bor ai mynsiem dei tang ha kita kiba pdiang bad ngeit ha U Jisu, kiba la aiti ia ka jingim jong ki ban long ki nongbud jong u. Te wat sngewthuh bakla ba u ïap tang na ka bynta ki khristan hynrei u ïap na ka bynta baroh ki jaid briew ha ka pyrthei, la ki dei ki khristan ne ki bym dei ki khristan. Kumba nga la ong myntan ba ka jingiap jong u pat, ka treikam bad ka long kordor dei tang ia kita kiba la pdiang ia u ha ka jingim jong ki ban long ki nongbud jong u Jisu, ym ka jong uno uno u briew ne jong kano kano ka kynhun Balang,  Namar dei u Jisu uba donkam eh ha ka jingim jong uno uno uba ngeit ha u.

3. U Blei U pyni ia ka Jingieit Jong U dei ha ka Jingiap U Jisu.

Rom:5:8

Hynrei U Blei U la pyni shynna ia la ka jong ka jingieit sha ngi, ha kaba ngi dang long kiba pop, U Khrist u la iap iapli ia ngi.

            Ka Baibl ka iathuh ia ngi wat la ngi leh pop pyrshah ia U Blei, ngi pynkheiñ ia ki hukum ki adong jong u. Ngi tam sneng na ka jingsneng jingkraw jong u; pynban U Blei U dang ieit hi ia ngi ki jingthaw ba kordor jong u. kumta u pyni ia kane ka jingieit jong u ia ngi da kaba u la phah ia U Jisu ban iap ha ka jaka jong nga jong phi ban pyllait ia ngi na ka jingpynshitom jong U Blei namar ki pop ba u bynriew u la leh. Te ia kata ka jingieit ka jong U Blei phi lah ia ka ban ioh ne sngewthuh haduh katno ba u ieit ia phi dei tang lyngba ka Jingiap jong U Jisu. U Jisu U iap na ka bynta jong phi dei namar ba U Blei U ieit ia phi, U Jisu U ieit ia phi, U ieit ia ki muslim, u ieit ia ki Hindu, u ieit ia kino kino ki briew bad u ieit ruh ia phi kiba don ha ka Ñiam Khasi. U Blei U ieit ia ngi namar ba um kwah ba ngin jot hynrei ba ngin ioh ia kata ka jingim bymjukut lyngba ka jingiap jong U Jisu;

Ioannis:3:16:

Naba U Blei U la ieit katta katta ia ka pyrthei katba u la aiti noh ia la U Khun(Jisu) ba la kha marwei, ba uei uei ruh uba ngeit ha U, un ym jot shuh, hynrei un ioh ka jingim bymjukut.

           

Kumta lada phi ngeit bad pdiang ia U Jisu ha ka jingim jong phi ba u iap na ka bynta jong phi, hangta phin sngewthuh ia kata ka jingieit kaba U Blei u la pyni sha ngi dei ha ka Jingiap u Jisu. Haba nga ong kumta ba U Blei u ieit ia ki briew baroh kata kam mut ba ka la biang, namar ka jingieit jong u ka don jingmut ha ka jingim jong uno uno u briew dei da kaba ki ngeit bad pdiang ia U Jisu ha ka jingim jong ki; lym kumta kata ka jingieit ka shu long lehnoh ei khlem U Jisu.

1Ioannis:3:16a:

Ha kane ngi la ithuh ia ka ka jingieit (jingieit U Blei) naba u la aiti noh ma u (Jisu) ia la ka jingim na ka bynta jong ngi.

4.  U Jisu U iap na ka bynta ba ngin iohmap na ki pop.

Rom:4:25a

Ia u (Jisu) ba la aiti(pyniap) noh na ka bynta ki jingpalat (pop) jong ngi

            U Jisu u la iap dei na ka bynta ban long ka jingkñia na ka bynta ki pop jong ngi, ho,oid ngi tip shwa ka jingwan U Jisu U Blei u la Hukum ia u Moses ba un pynlong ka jingkñia man la ka snem na ka bynta ki pop jong ki khun Israel. Bad kane ka jingkñia kaba la leh ha ka testament kaba rim ia kaba U Blei u la hukum, ka treikam dei tang na ka bynta ki jaid briew Israel, ym ia baroh ki briew kiba don ha ka pyrthei, ka dei tang ia ki Israel kiba mane ia une u Blei uba ka Baibl ka khot U JEHOVAH kaba long ka kyrteng U Blei. Bad ia kane ka jingkñia la leh man la ka snem kat kum ki kyndon bad ki hukum kiba U Blei u la buh, la iathuh ruh ba kane ka jingkñia kam lah ban pynkhuid ia ki pop jong u briew, hynrei tang ban tap noh ia ka pop ki briew da ka snam; haba U Blei U peit ia ka pop u briew ha ka jaka ba la kñia ba  un iohi dei tang ia ka snam jong ki mrad ba la pyniap ha ka jaka u briew khnang ba U Blei un ym bitar ne pynshitom ia u briew namar ka pop kaba ki la leh. Te suki suki katba kata ka por kaba U Blei U la buh ba U Jisu un wan kam pat poi, ka jingkñia namar ki pop ka iaid shait shait man la ka snem. Kane ka jingleh ia ka jingkñia man la ka snem ka pyni ba ka snam ki mrad kam lah ban pynkhuid ia ka pop u briew na kata ka daw hap ban kñia man la ka por.

Hebru: 10:3-4:

Hynrei ha kita ki jingkñia don ka jingpynkynmaw ia ki pop ha la ka snem ka snem. Namar ka bym lah ia ka snam ki masi kyrtong bad ki blang ban kit (map) noh ia ki pop.

            Hynrei ynda U Jisu u la wan, u la long u langkñia na ka bynta ki pop jong ki briew baroh ym tang ia ki jaid briew Israel, u long langkñia na ka bynta ki muslim, ki hindu, ki budhist, ia ki bym ngeit blei bad kumjuh ruh ia phi kiba don ha ka Ñiam Khasi ne Ñiamtre. Ka Baibl ka iathuh ia ngi ba ka jingiap jong u Jisu ka long ka jingpynkut ia ka jingkñia da ki mrad namar ka snam ki mrad kam lah ban pynim ia ngi, ka snam ki mrad ka long kaba tlot bad ka long ruh ka dur ba un sa wan u ban pyndep ia ka jingkñia namar ki pop da ka jingim jong u ha ka ban pynkut noh ia baroh ki jait jingkñia, namar ka jingiap jong u ka la pynhun ia U Blei JEHOVAH, bad dei ha ka snam jong u Jisu, U Blei JEHOVAH U la map lut ia ki pop jong ki briew baroh; kata ka mut ia ki pop ba ki briew ki la dep leh, ka pop ba ki leh mynta bad ka pop kaba kin sa leh lashai la shisngi ruh u la map lut ia ki ha ka snam bad ka jingiap U Jisu. Haba nga ong kumne kam mut ba nga pynshlur ia phi ban leh pop namar ba U Blei U la map lut ia ki pop jong phi. Namar kita kiba dang bteng ban leh pop man la ka sngi ki dei ki briew ki bym sngewnguh ia U Blei bad ka jingngeit jong ki ha U ruh ka long kaba artatien, ki don tang ka kyrteng khristan hynrei ha ka dohnud ki jngai na U Jisu bad na ki jinghikai jong u. Namar ki khristan ba shisha kiba bud shisha ia u Jisu ki im ka jingim kumba U Jisu U hikai. Kumta nga khot ia phi ki paralok, lada phi kwah ban ioh ia ka jingmap na ki pop ban lait na ka jingpynshitom U Blei pdiang ia U Jisu ha ka Jingim jong phi. Namar kata ka jingmap jong U Blei ka treikam dei tang ha kita kiba pdiang bad ngeit ha U Jisu.

Ioannis:8:24:

Namar kata nga la ong ha phi, ba phin iap ha kita ki pop jong phi; namar lada phim ngeit ba nga (U Jisu) , nga long ma u, phin iap ha kita ki pop jong phi.